முள்வாய்

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: வேலூர் 

திருக்கோயில்: புதியதொரு முருகன் திருக்கோயில் புதுக்கப் பெற்று வருகின்றது.

தல வகை: முருகன் திருக்கோயில் 

பாடிய அருளாளர்கள்: அருணகிரிநாதர்

தலக் குறிப்புகள்:

வேலூர் மாவட்டத் திருத்தலம்,  அரக்கோணத்திலிருந்து சுமார் 10 கிமீ தொலைவிலும், திருவாலங்காட்டிலிருந்து சுமார் 7 கி.மீ தொலைவில் அமைந்துள்ளது முள்வாய். 

முன்பொரு சமயம் இத்தலத்தில் சிவாலயம் ஒன்றிருந்துப் பின் இவ்வூரின் தாழ்வான பகுதியோடு ஆலயமும் புதையுண்டு போயிருக்கக் கூடும் என்று திரு.வலையப்பேட்டை கிருஷ்ணன் அவர்கள் தம்முடைய 'அருணகிரிநாதர் அடிச்சுவட்டில்' எனும் ஆய்வு நூலில் குறிக்கின்றார். 

2019ஆம் ஆண்டு - ஆலயம் ஏதுமில்லை என்று அறிந்திருந்தும், அருணகிரிப் பெருமானின் திருப்பாதங்கள் தோய்ந்த தலமாதலின்,  ஆவலுடன் தரிசிக்கச் சென்றிருந்தோம்.

இன்றோ சிவத்திரு Kabilan Arunachalam ஐயா அவர்களின் அரிய பெரிய பிரயத்தனத்தினால் இத்தலத்தில் நன்முறையில் ஆலயமொன்று புதுக்கப் பெற்று வருகின்றது. நேரில் சென்று தரிசித்தால் மட்டுமே இது அசாதாரணமான முயற்சி என்பது புலப்படும். 

களப்பணி மிகமிகக் கடினம், கபிலன் ஐயா இத்திருப்பணிக்கென மேற்கொண்டு வரும் முயற்சிகள் வார்த்தைகளில் அடங்காதவை.

2027ஆம் ஆண்டு இவ்வாலய குடமுழுக்கு விழா சிறப்புற நிகழுமாறு நிச்சயிக்கப் பெற்றுள்ளது. 

அருணகிரிநாதர் இத்தலத்திற்கென ஒரு திருப்புகழ் திருப்பாடலை அருளியுள்ளார், 

(Google Maps: Mulvoy Murugan Temple)

திருப்புகழ் பாடல்கள்:

இத்தலத்துக்கு கிடைத்துள்ள திருப்புகழ் பாடல் 1.

(குறிப்பு: கீழ்க்குறித்துள்ள திருப்பாடல் பாராயணம் புரிவதற்கு எளிதான முறையில், சந்தஓசை மாறாத வண்ணம், முறையாகப் பிரித்துத் தொகுக்கப் பெற்றுள்ளது): 

தன்னா தனந்த தந்த, தன்னா தனந்த தந்த

     தன்னா தனந்த தந்த ...... தனதான

மின்னார் பயந்த மைந்தர் தன்நாடினங் குவிந்து

     வெவ்வேறுழன்றுழன்று ...... மொழிகூற

விண்மேல் நமன்கரந்து மண்மேல் உடம்பொருங்க

     மென்னாள் அறிந்தடைந்து ...... உயிர்போமுன்

பொன்னார் சதங்கை தண்டை முந்நூல் கடம்பணிந்து

     பொய்யார் மனங்கள் தங்கும் ...... அதுபோலப்

பொல்லேன் இறைஞ்சிரந்த சொல்நீ தெரிந்தழுங்கு

     புல்நாயுளுங் கவின்று ...... புகுவாயே

பன்னாள் இறைஞ்சும் அன்பர் பொன்னாடுறங்கை தந்து

     பன்னாகணைந்து சங்கம் ...... உறவாயில்

பன்னூல் முழங்கலென்று விண்ணோர் மயங்க நின்று

     பண்ணூதுகின்ற கொண்டல் ...... மருகோனே

முன்னாய் மதன்கரும்பு வின்னேர் தடந்தெரிந்து

     முன்ஓர் பொருங்கை என்று ...... முனையாட

மொய்வார் நிமிர்ந்த கொங்கை மெய்ம் மாதர் வந்திறைஞ்சு

     முள்வாய் விளங்க நின்ற ...... பெருமாளே

(2026 நவம்பர் மாதம் சென்றிருந்த தலயாத்திரையின் பொழுது எடுக்கப்பட்ட காட்சிகள் இவை)