திருப்புகழ் தலங்கள்: வடுகூர்

(நடு நாட்டுத் திருப்புகழ் தலங்கள்)

பிரிவு: நடு நாடு

மாவட்டம்: புதுவை

திருக்கோயில்: அருள்மிகு திரிபுரசுந்தரி அம்மை சமேத வடுகீஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், திருஞானசம்பந்தர் (தேவாரம்)

தலக் குறிப்புகள்:

புதுவை மாநில எல்லைக்குள், புதுவையிலிருந்தும் விழுப்புரத்திலிருந்தும் சுமார் 20 கி.மீ தூரத்தில் அமைந்துள்ளது திருவடுகூர், இங்குள்ள ஆண்டவனார் கோயில் எனும் சிவாலயம் திருஆண்டார்கோவில் என்று பின்னாளில் மருவி, தற்பொழுது இவ்வூரின் பெயரும் 'திருவாண்டார் கோயில்' என்றே வழங்கப் பெற்று வருகின்றது. ஞானசம்பந்த மூர்த்தி பாடிப் பரவிய திருத்தலம்.

சிவபெருமான் வடுகீஸ்வரர்; பஞ்சநதீஸ்வரர் எனும் திருநாமங்களிலும் அம்பிகை திரிபுரசுந்தரி எனும் திருநாமத்திலும் எழுந்தருளி இருக்கின்றனர். வெளிப் பிரகாரத்தை வலம் வருகையில், கருவறையின் பின்புறம், வலது புறத்தில் வேலாயுத தெய்வம் ஆறு திருமுகங்களுடனும்; பன்னிரு திருக்கரங்களில் ஆயுதங்களுடனும், இரு தேவியரும் உடனிருக்க, திருமுகத்தில் புன்முறுவலோடு, மயில் மீதமர்ந்த அற்புதத் திருக்கோலத்தில் எழுந்தருளி இருக்கின்றான்.

(Google Maps: NNT016 - Panchanadisvara temple, Thiruvandarkoil)