திருப்புகழ் தலங்கள்: திருமுட்டம் (ஸ்ரீமுஷ்ணம்):

(நடு நாட்டுத் திருப்புகழ் தலங்கள்)

பிரிவு: நடு நாடு

மாவட்டம்: கடலூர்

திருக்கோயில்: அருள்மிகு அன்னை பெரிய நாயகி சமேத ஸ்ரீநிதிலேஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

விருத்தாசலத்திலிருந்து 20 கி.மீ தொலைவிலும், எருக்கத்தம்புலியூரிலிருந்து 8 கி.மீ தொலைவிலும் அமைந்துள்ளது ஸ்ரீமுஷ்ணம். பிரசித்தி பெற்ற பூவராகப் பெருமாள் திருக்கோயிலுக்கு மிக அருகிலேயே அமையப் பெற்றுள்ள இத்தலத்தினை அருணகிரிநாதர் திருமுட்டம் என்று குறிக்கின்றார்.

திருக்கோயிலுக்கு எதிரில் அமைந்துள்ள பெரியதொரு திருக்குளத்தினை தரிசித்தவாறே ஆலயத்தினுள் நுழைகின்றோம், மிகப் பிரமாண்டமான திருக்கோயில் வளாகம், 12ஆம் நூற்றாணடில் குலோத்துங்க சோழனால் எழுப்பப்பெற்ற இக்கற்கோயில் தொல்லியல் துறையின் கட்டுப்பாட்டில் பேணப் பெற்று வருகின்றது. மூல மூர்த்தி நித்திலேஸ்வரர் சிறிய திருமேனியராய் எழுந்தருளி இருக்கின்றார், அம்பிகை பெரிய நாயகி, ஹரிபுஜேஸ்வரர் எனும் மற்றொரு திருச்சன்னிதியையும் பிரகாரச் சுற்றில் தரிசிக்கலாம்.

வெளிப் பிரகாரத்தினை வலம் வருகையில், மூலக் கருவறையின் பின்புறம் திருப்புகழ் தெய்வமான முருகக் கடவுள் ஆறு திருமுகங்களோடு, இரு தேவியரும் உடனிருக்க, மயில் மீதமர்ந்த திருக்கோலத்தில் எழுந்தருளி இருக்கின்றான், அருணகிரியார் இம்மூர்த்திக்கு இரு திருப்புகழ் திருப்பாடல்களை அருளியுள்ளார். அவசியம் தரிசித்துப் போற்ற வேண்டிய திருத்தலம்.

(Google Maps: Srimushnam Sri Nithileswara Swamy Temple (Sivan), Srimushnam, Tamil Nadu 608703, India)