திருப்புகழ் தலங்கள்: வயிரவிவனம்

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: காஞ்சிபுரம்

திருக்கோயில்: அருள்மிகு சோளீசுவரர் - வயிரேசுவரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

காஞ்சிபுரத்தில் 'பிள்ளையார் பாளையம்' எனும் பகுதியில் அமைந்துள்ள அஷ்ட பைரவர் திருக்கோயிலே திருப்புகழ் பெற்றுள்ள 'வயிரவி வனம்' எனும் தலமாகும். 'சோளீஸ்வரர் திருக்கோயில்' என்றும் பிரசித்தமாக அறியப்பட்டு வரும் இந்த ஆலயம் தேவாரத் தலமான திருக்கச்சி மேற்றளியிலிருந்து 5 நிமிட பயணத் தொலைவில் அமைந்துள்ளது.

நெடுநாள் வரையினில் இத்தலம் பஞ்சாபில் இருப்பதாகக் கருதப்பட்டு வந்தது, திரு.வலையப் பேட்டை கிருஷ்ணன் அவர்கள் இதுகுறித்து எண்ணற்ற நூல்களில் ஆராய்ந்துப் பின் காஞ்சியிலுள்ள இத்தலமே வயிரவி வனம் என்று ஐயத்திற்கு இடமின்றி நிறுவியுள்ளார்.

அருணகிரிநாதர் இத்தலத் திருப்புகழில் 'சரஸ்வதி நதிக்கண் வீறு வயிரவி வனம்' என்று குறிக்கின்றார், 'காஞ்சீபுரத்தில் சரஸ்வதி நதியா?' எனும் வினாவிற்கான அற்புத விளக்கத்தினைத் திரு.வலையப் பேட்டை கிருஷ்ணன் அவர்கள் காஞ்சிப் புராணத்தின் வாயிலாக நமக்களிக்கின்றார். பிரம்மா ஒரு சமயம் காஞ்சியில் பெரும் வேள்வியொன்றினைத் துவக்க, அதனைத் தடுக்கும் நோக்குடன் அன்னை சரஸ்வதி பெரு நதியாய்ப் பெருக்கெடுத்து வர, பாற்கடல் வாசனாரான ஸ்ரீமகாவிஷ்ணு நான்முகனாரின் வேள்வியினைக் காக்கும் பொருட்டு அந்நதியைத் தடுக்க, வேகம் தணியப் பெறும் அன்னை சரஸ்வதி 'வேகவதி நதியென' காஞ்சியில் பிரவகித்துப் பாய்கின்றாள். அதன் கரையினில் அமைந்துள்ள தலமே 'வயிரவி வனம்'.

திருக்கோயிலில் மூல மூர்த்தியோடு அஷ்ட பைரவர்கள் மட்டுமே பிரதானமாய் எழுந்தருளி உள்ளனர், அம்பிகைக்குத் தனிச்சன்னிதி இல்லை, ஆலய முகப்பிலேயே இடது புறம் யானை முக தெய்வமும் , வலது புறம் சற்றே தாழ்ந்து அமைந்துள்ள திருச்சன்னிதியினுள் 'இரு தேவியருடன் மயில் மீதமர்ந்த அழகுத் திருக்கோலத்தில் திருப்புகழ் தெய்வமான வேலாயுதக் கடவுளும்' எழுந்தருளி இருக்கின்றனர்.

(Google Maps: Shri Soleeswarar Temple, Unnamed Road, 631501, Pillaiyarpalayam, Kanchipuram, Tamil Nadu 631501)