திருப்புகழ் தலங்கள்: கோசைநகர் (கோயம்பேடு):

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: சென்னை

திருக்கோயில்: அருள்மிகு குறுங்காலீஸ்வரர் திருக்கோயில்

தல வகை: சிவத் தலம்

பாடிய அருளாளர்கள்: அருணகிரிநாதர்

தலக் குறிப்புகள்:

சென்னை - கோயம்பேடு பகுதியில் அமைந்துள்ளது கோசை நகர் திருப்புகழ் தலம். ஸ்ரீராமரின் திருக்குமாரர்களான லவ குசர்கள் பூசித்துப் பேறு பெற்றுள்ள தலம் - ஆதலின் திரேதா யுக இறுதியிலிருந்து விளங்கி வரும் தொன்மையான தலம். இந்நெடிய காலகட்டத்தில் திருக்கோயில் எண்ணிறந்த முறை செப்பனிடப் பெற்றும், புதுப்பிக்கப் பெற்றும் வந்திருக்கக் கூடும் எனினும் சிவமூர்த்தி மிகப் புராதனத் திருமேனியர்.

2025ஆம் ஆண்டு டிசம்பர் மாதம் குடமுழுக்கு சிறப்புற நடந்தேறியுள்ளது. சற்று விசாலமான திருக்கோயில் வளாகம், வளாகத் துவக்கத்திலிருந்து பிரதான கோபுர வாயிலை அடையவே சற்று தூரம் பயணித்து வர வேண்டும், குறுங்காலீஸ்வரப் பரம்பொருள் சிறிய திருமேனியராய் எழுந்தருளி இருக்கின்றார், அம்பிகை தர்ம சம்வர்த்தினி.

வெளிப் பிரகாரச் சுற்றின் நிறைவுப் பகுதியில் தனிச்சன்னிதியில் திருப்புகழ் தெய்வமான நம் கந்தக் கடவுள் இரு தேவியருடன் நின்ற திருக்கோலத்தில் எழுந்தருளி இருக்கின்றான். அருணகிரியார் இம்மூர்த்திக்கென ஒரு திருப்பாடலை அருளிச் செய்துள்ளார். அவசியம் தரிசித்துப் பயன் பெற வேண்டிய திருத்தலம்.

(Google Maps: SRI KURUNGALEESHWARAR TEMPLE, Virrugambakkam, Koyambedu, Chennai, Tamil Nadu 600107, India)