திருப்புகழ் தலங்கள்: விரிஞ்சிபுரம்:

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: வேலூர்

திருக்கோயில்: அருள்மிகு மரகதாம்பிகை உடனுறை மார்க்கபந்தீஸ்வரர் திருக்கோயில்.

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

சென்னையிலிருந்து சுமார் 140 கி.மீ தூரத்திலும், வேலூர் நகரத்திலிருந்து 16 கி.மீ தொலைவிலும் அமைந்துள்ளது பிரசித்தமான தலமான விரிஞ்சிபுரம். விசாலமான திருக்கோயில், ஆலய வளாகத்தில் நுழைந்தவுடன் பிரமாண்டமான திருமேனியுடன் எழுந்தருளியுள்ள விநாயகப் பெருமானைத் தரிசித்து மகிழலாம். மூலக் கருவறையில் நெடிதுயர்ந்த (மெலிதான) திருமேனியுடன் எழுந்தருளியுள்ள தனிப்பெரும் தெய்வமான மார்க்கபந்தீஸ்வரரின் திருக்கோலம் வார்த்தைகளால் விளக்கவொண்ணாதது, காண்பதற்கரியது.

வெளிப் பிரகாரச் சுற்றில், மூலக் கருவறைக்குப் பின்புறம், வேலாயுத தெய்வம் தனிச்சன்னிதியில் 'ஆறு திருமுகங்களுடனும், பன்னிரு திருக்கரங்களுடனும், 6 அடி உயரத் திருமேனியுடனும், வள்ளி தெய்வயானை தேவியருடனும், மயில் மீதமர்ந்த அதிகம்பீரமான திருக்கோலத்தில் எழுந்தருளி இருக்கின்றான். பிரகாரச் சுற்றின் இறுதியில் உலகீன்ற உமையன்னை மரகதாம்பிகை எனும் திருநாமத்துடன் தனிக்கோயிலில் எழுந்தருளி இருக்கின்றாள்.

அருணகிரிப் பெருமான் இத்தலத்திற்கென இரு திருப்புகழ் திருப்பாடல்களை அருளியுள்ளார், அவசியம் தரிசித்துப் பயன் பெற வேண்டிய அற்புதத் திருத்தலம்.