திருப்புகழ் தலங்கள்: ஞான மலை:

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: வேலூர்

திருக்கோயில்: அருள்மிகு ஞான பண்டித சுவாமி திருக்கோயில்.

தல வகை: முருகன் திருக்கோயில்

பாடிய அருளாளர்கள்: அருணகிரிநாதர்

தலக் குறிப்புகள்:

வேலூர் மாவட்டத்திலுள்ள காவேரிப்பாக்கம் எனும் ஊரிலிருந்து சோளிங்கர் செல்லும் பாதையில் 14 கி.மீ பயணித்தால், கோவிந்தச்சேரி எனும் பகுதியில் அமைந்துள்ள ஞான மலையினை அடையலாம்.

பன்னெடுங்கால ஆய்வு மற்றும் முயற்சிக்குப் பின்னரும் ஞான மலை எனும் இத்தலத்தின் அமைவிடம் முதலில் அறியப்படாதிருந்தது, பின்னர் 1998 ஆம் ஆண்டு இம்மலையில் கண்டெடுக்கப் பெற்ற அரிய சில கல்வெட்டுகள் வாயிலாக இத்தலமே 'திருப்புகழில் அருணகிரியார் போற்றியுள்ள ஞான மலை' என்பது ஐயத்திற்கு இடமின்றி நிரூபணம் ஆனது

அருணகிரியாருக்கு ஆறுமுகக் கடவுள் 'திருவடிக் காட்சியினையும், ஞான அனுபூதியினையும், வள்ளி தேவியோடு கூடிய அற்புதத் திருக்கோல தரிசனத்தையும்' அளித்து அருள் புரிந்த தலமாக இம்மலை திகழ்கின்றது. வேலாயுத தெய்வம் வள்ளியம்மையை மணம் புரிந்து திருத்தணி செல்லும் மார்க்கத்தில் இம்மலையில் ஒரு தினம் எழுந்தருளி இருந்ததாகத் தல புராணம் அறிவிக்கின்றது.

150 படிகளைக் கடந்து சென்றால் இரு ஆலயங்களைத் தரிசிக்கலாம், ஒன்று சமீபத்தில் (2018 ஆண்டு ஆகஸ்ட் மாதம்) புதுக்கப் பெற்றுள்ள திருக்கோயில், மற்றொன்று ஞானவேல் மண்டபத்தோடு கூடிய, அருணகிரியாரால் பாடல் பெற்றுள்ள 'ஞான பண்டித சுவாமியின்' திருக்கோயில். மூலக் கருவறையில் கந்தக் கடவுள் 'ஒரு திருமுகம் மற்றும் நான்கு திருக்கரங்களுடன், பிரமனை தண்டித்த பிரம்ம சாஸ்தா திருக்கோலத்தில், இரு தேவியரோடும்' ஆனந்தமாய் எழுந்தருளி இருக்கின்றான். பிரகாரச் சுற்றில் 'அருணகிரியார் வணங்கிய நிலையிலுள்ள குறமகள் தழுவிய குமரனின்' திருச்சன்னிதி காண்பதற்கரிய திருக்காட்சி.

இவ்விடத்திலிருந்து மேலும் சிறிது தூரம் மேலேறிச் சென்றால் ஞானவெளிச் சித்தர் தவம் புரிந்த, ஆறுமுகக் கடவுளின் திருவடிச் சுவடுகள் பதியப் பெற்றுள்ள சிறு மண்டபத்தினையும் தரிசித்து மகிழலாம். அருணகிரிநாதர் இத்தலத்திற்கென இரு திருப்புகழ் திருப்பாடல்களை அருளியுள்ளார், அவசியம் தரிசித்துப் பயன்பெற வேண்டிய ஏகாந்தமான திருத்தலம்.

(Google Maps: Jnana Malai Śrī Subrahmanya Swami Temple, Govindacheri, Vellore, Tamil Nadu 632505, India)