திருப்புகழ் தலங்கள்: சேயூர் (செய்யூர், வளவாபுரி):

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: காஞ்சிபுரம்

திருக்கோயில்: அருள்மிகு கந்தசுவாமி திருக்கோயில்

தல வகை: முருகன் திருக்கோயில்

பாடிய அருளாளர்கள்: அருணகிரிநாதர்

தலக்குறிப்புகள்:

காஞ்சிபுரம் மாவட்டத்தில், மதுராந்தகத்திலிருந்து 26 கி.மீ தொலைவிலும், மேல்மருவத்தூரிலிருந்து 23 கி.மீ தொலைவிலும், சென்னையிலிருந்து சுமார் 100 கி.மீ தூரத்திலும் அமைந்துள்ளது செய்யூர், ஆதியில் இத்தலம் 'வளவாபுரி' என்றே அறியப்பட்டு வந்துள்ளது, அருணகிரிப் பெருமானும் 'வளவாபுரி வாழ் மயில்வாகனப் பெருமாளே' என்று இப்பெயரினைக் கொண்டே போற்றியுள்ளார்.

மூலக் கருவறையில் திருப்புகழ் தெய்வம் 'நான்கு திருக்கரங்களோடு கூடிய கம்பீரமான நின்ற திருக்கோலத்தில், வள்ளி தெய்வயானை தேவியரும் உடனிருக்க ஆச்சரியமாய் எழுந்தருளி இருக்கின்றான், வெளிப்பிரகாரத்தில் அருணகிரிநாதர் சிறிய சன்னிதியொன்றில் எழுந்தருளி இருக்கின்றார்.

திருக்கோயிலைச் சுற்றி 27 நட்சத்திரங்கள் ஒவ்வொன்றிற்கும் தனித்தனியே ஒரு வேதாள கணம் எனும் கணக்கில் 27 வேதாளங்களுக்கான தனிச்சன்னிதி அமைக்கப் பெற்றுள்ளது. சிவகணங்களாக விளங்கும் இவ்வேதாளங்கள் சூர சம்ஹார யுத்தத்தில் முருகப் பெருமானுக்கு உடனிருந்துத் தொண்டாற்றும் பேறு பெற்றவர்களாவர், 'வேதாளகணம் புகழ் வேலவனை' என்று கந்தர் அனுபூதி பேசுகின்றது. அருணகிரிநாதர் இத்தலத்திற்கென ஒரு திருப்புகழ் திருப்பாடலை அருளியுள்ளார், அவசியம் தரிசித்துப் பயன்பெற வேண்டிய திருத்தலம்.

(Google Maps: Shri Kandasamy Temple, State Highway 115, Cheyur, Tamil Nadu, India)