திருப்புகழ் தலங்கள்: கொங்கணகிரி:

(கொங்கு நாட்டுத் திருப்புகழ் தலங்கள்)

பிரிவு: கொங்கு நாடு

மாவட்டம்: திருப்பூர்

திருக்கோயில்: அருள்மிகு முத்துக்குமாரசுவாமி திருக்கோயில்

தல வகை: முருகன் திருக்கோயில்

பாடிய அருளாளர்கள்: அருணகிரிநாதர்

அமைவிடம் (செல்லும் வழி):

திருப்பூரிலுள்ள மூன்று முருகன் திருக்கோயில்கள் (வெவ்வேறு ஆய்வுகளின் அடிப்படையில்) தத்தமது ஆலயங்களைக் கொங்கணகிரியாய் முன்னிறுத்திக் கொள்கின்றன.

(1) சிவத்திரு தணிகைமணி அவர்கள் முதற்கட்ட ஆய்வினை மேற்கொண்டு, திருப்பூரிலிருந்து சுமார் 15 கி.மீ தொலைவில்; சின்னப் புதூர் எனும் சிற்றூருக்கு அருகிலுள்ள பகுதியில், 18 படிகளோடு கூடிய சிறிய குன்றொன்றில் எழுந்தருளியுள்ள குழந்தை வேலாயுத சுவாமி திருக்கோயிலையே கொங்கணகிரியாய்க் கருதுகின்றார்.

(2) தணிகைமணி அவர்களின் ஆய்வினை மேலும் தொடரும் 'அருணகிரிநாதர் அடிச்சுவட்டில்' நூலாசிரியரான சிவத்திரு. வலையப்பேட்டை கிருஷ்ணன் அவர்கள், திருப்பூர் பகுதியிலுள்ள பிற முருகன் திருக்கோயில்களின் அமைப்பு, மூல மூர்த்தி மற்றும் இன்னபிற சன்னிதிகளின் அமைப்பு; கொங்கண சித்தரோடு உள்ள தொடர்பு இவற்றையெல்லாம் நன்கு ஆய்ந்தறிந்து, திருப்பூரிலிருந்து 36 கி.மீ தூரத்திலும், காங்கேயத்திலிருந்து 7 கி.மீ தூரத்திலும் அமைந்துள்ள வட்டமலை எனும் மலைக்கோயிலையே திருப்புகழ் தலமாக முன்மொழிகின்றார்.

(3) திருப்பூரிலிருந்து சுமார் 3 கி.மீ தூரத்தில், கொங்கணகிரி எனும் பெயரிலேயே, புதிதாக எழுப்பப் பெற்றுள்ள திருக்கோயிலொன்று உள்ளது. பெயர் ஒற்றுமை சிறிது இருப்பினும் வட்டமலையே திருப்புகழ் தலமாகக் கொள்ளுதல் ஏற்புடையது என்பது திரு. வலையப்பேட்டை கிருஷ்ணன் அவர்களின் இறுதிக் கருத்து.

'அருணகிரிநாதர் அடிச்சுவட்டில்' நூலே திருப்புகழ் தலங்களுக்கான இறுதிப் பிரமாண நூலாக அமைந்துள்ள தன்மையினால் இனி வட்டமலை குறித்து காண்போம்,

ஏகாந்தமான சூழலில் அமைந்துள்ள மலைக்கோயிலில், ஒரு திருமுகமும் நான்கு திருக்கரங்களுமாய்; இரு தேவியரும் உடனிருக்க, முத்துக் குமார சுவாமி எனும் திருநாமத்தில் கந்தப் பெருமான் அற்புதத் திருக்கோலத்தில் எழுந்தருளி இருக்கின்றான்.

(Google Maps: Vattamalai Murugan Temple, Kangayam - Dharapuram Road, Vattamalai, Tamil Nadu)