திருப்புகழ் தலங்கள்: தென்சேரிகிரி (செஞ்சேரி மலை):

(கொங்கு நாட்டுத் திருப்புகழ் தலங்கள்)

பிரிவு: கொங்கு நாடு

மாவட்டம்: கோவை

திருக்கோயில்: அருள்மிகு வேலாயுத சுவாமி திருக்கோயில்

தல வகை: முருகன் திருக்கோயில்

பாடிய அருளாளர்கள்: அருணகிரிநாதர்

அமைவிடம் (செல்லும் வழி):

கோவை ரயில் நிலையத்திலிருந்து 45 கி.மீ தூரத்திலும், உடுமலைப்பேட்டையிலிருந்து 30 கி.மீ தூரத்திலும் அமைந்துள்ளது செஞ்சேரிமலை. மந்திரகிரி என்றும் அறியப் பெறும் இத்தலத்தை அருணகிரியார் தென்சேரிகிரி என்று குறிக்கின்றார். ஏகாந்தமானதொரு திருச்சூழலில் 300 படிகளோடு அழகுற விளங்குகின்றது இம்மலைக்கோயில்.

திருப்புகழ் தெய்வமான செஞ்சேரிமலை வேலவன் இத்தலத்தில் ஆறு திருமுகங்களும் பன்னிரு திருக்கரங்களுமாய்; இருபுறமும் தேவியர் உடனிருக்க அற்புதத் திருக்கோலத்தில் எழுந்தருளி இருக்கின்றான். சேவற்கொடிக்கு மாறாக, இடது மேல் திருக்கரத்தில் சேவலையே ஏந்தியிருப்பது தனித்துவமான திருக்காட்சி. அருணகிரிப் பெருமான் இதனை 'செஞ்சேவல் செங்கை உடைய சண்முக தேவே' என்று வியந்து போற்றுகின்றார்.

(கருவறையிலுள்ள மிதமான வெளிச்சம் காரணமாக) நாம் நின்று தரிசிக்கும் இடத்திலிருந்து மூலமூர்த்தியின் திருக்கரத்திலுள்ள சேவல் துல்லியமாகத் தெரிவதில்லை. எனினும் அதே அமைப்பில் எழுந்தருளியுள்ள உற்சவ மூர்த்தியின் திருக்கரத்தினில் சேவலை மிகத் தெளிவாக, அருகாமையிலேயே தரிசித்து அற்புதம் அடைலாம்.

அருணை மாமுனிவர் இத்தலத்திற்கென, 'எங்கேனும் ஒருவர்வர', 'கொண்டாடிக் கொஞ்சு மொழிகொடு' என்று துவங்கும் இரு திருப்புகழ் திருப்பாடல்களை அருளிச் செய்துள்ளார். அவசியம் தரிசித்துப் பயன்பெற வேண்டிய திருத்தலம்.

(Google Maps: Mandhiragiri Velayudha Swamy Temple)