திருப்புகழ் தலங்கள்: யாழ்ப்பாணாயன் பட்டினம் (திருஎருக்கத்தம்புலியூர்)

(நடு நாட்டுத் திருப்புகழ் தலங்கள்)

பிரிவு: நடு நாடு

மாவட்டம்: கடலூர்

திருக்கோயில்: அருள்மிகு நீலகண்டேஸ்வரர் (குமாரசுவாமி) திருக்கோயில்

தல வகை: சிவத்தலம்

பாடிய அருளாளர்கள்: திருஞானசம்பந்தர் (தேவாரம்), அருணகிரிநாதர்

தலக் குறிப்புகள்:

கடலூரிலிருந்து 73 கி.மீ தூரத்திலும், சிதம்பரத்திலிருந்து 45 கி.மீ தூரத்திலும், விருத்தாசலத்திலிருந்து 13 கி.மீ தொலைவிலும், ஸ்ரீமுஷ்ணத்திலிருந்து 7 கி.மீ தொலைவிலும் அமைந்துள்ளது திருஎருக்கத்தம்புலியூர் (தற்கால வழக்கில் இராஜேந்திர பட்டினம்). திருநீலகண்ட யாழ்ப்பாண நாயனாரின் அவதாரத் தலமாதலால் அருணகிரியார் இத்தலத்தினை அவரின் திருப்பெயரினைக் கொண்டே 'யாழ்ப்பாணாயன் பட்டினம்' என்று போற்றுகின்றார், புலிக்கால் முனிவரான வியாக்ரபாதர் பூசித்த தலங்களுள் ஒன்று, ஞானசம்பந்த மூர்த்தியால் பாடல் பெற்றுள்ள சிறப்புப் பொருந்தியது.

நகரங்களின் ஆரவாரம் மற்றும் வாகன நெரிசல்கள் ஏதுமில்லாத மிகவும் ஏகாந்தமான திருச்சூழலில் அமைந்துள்ள திருத்தலம், அருகிலேயே அமைந்துள்ள பெரியதொரு ஆலயத் திருக்குளம் தலத்திற்கு மேலும் அழகு சேர்க்கின்றது. ஆலய நுழைவிலேயே தனிச்சன்னிதியில் எழுந்தருளியுள்ள திருநீலகண்ட யாழ்ப்பாண நாயனாரைத் தரிசித்துப் பணிகின்றோம், மூலக் கருவறையில் சிவமூர்த்தி 'நீலகண்டேஸ்வரர்; குமராசுவாமி; சுவாதர்க்கவனேஸ்வரர்' எனும் திருநாமங்களில் எழுந்தருளி இருக்கின்றார், அம்பிகை நீலமலர்க்கண்ணி; வீராமுலையம்மை.

வெளிப்பிரகாரத்தினை வலம் வருகையில், மூலக் கருவறையின் பின்புறம் திருமுறைக்குப் பண்ணிசைத்த, பாணர் மரபில் தோன்றிய வள்ளியம்மையைத் தரிசித்து மகிழலாம், அருகில் மற்றுமொரு திருச்சன்னிதியில் நால்வர் பெருமக்களோடு, திருநீலகண்ட யாழ்ப்பாண நாயனார்; அவர்தம் திருத்துணைவியார் மதங்க சூளாமணியார் ஆகியோரோடு சேக்கிழார் அடிகளையும் தரிசித்துப் போற்றலாம். அடுத்து திருப்புகழ் தெய்வமான நம் கந்தக் கடவுள் ஒரு திருமுகம்; நான்கு திருக்கரங்களுமாய், நின்ற திருக்கோலத்தில், இரு தேவியரும் உடனிருக்க ஆச்சரியமாய் எழுந்தருளி இருக்கின்றான். அருணகிரியார் இம்மூர்த்திக்கு ஒரு திருப்புகழ் திருப்பாடலை அருளியுள்ளார், அவசியம் தரிசித்துப் பயன்பெற வேண்டிய திருத்தலம்,

(Google Maps: Sri Kumaraswamy Temple (Erukathampuliyur), Rajendra Pattinam, Vannankudikadu, Tamil Nadu 608703, India )