திருப்புகழ் தலங்கள்: திருவதிகை

(நடு நாட்டுத் திருப்புகழ் தலங்கள்)

பிரிவு: நடு நாடு

மாவட்டம்: கடலூர்

திருக்கோயில்: அருள்மிகு பெரிய நாயகி அன்னை சமேத ஸ்ரீவீரட்டானேஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், திருஞானசம்பந்தர் (தேவாரம்), அப்பர் (தேவாரம்), சுந்தரர் (தேவாரம்)

தலக் குறிப்புகள்:

தேவார மூவராலும் பாடல் பெற்றுள்ள சிறப்புப் பொருந்தியது, அஷ்ட வீரட்டான தலங்களுள் திரிபுர சம்ஹாரம் நடந்தேறிய தலம், நாவுக்கரசு சுவாமிகள் சூலை நீங்கித் திருவருள் பெற்றுச் சைவ சமயம் சார்ந்த தலம், திருநாவுக்கரசரின் தமக்கையாரான திலகவதியார் பலகாலும் திருத்தொண்டு புரிந்து வந்த தலம். மிக மிக மிகப் பிரமாண்டமான திருக்கோயில் வளாகம், விண்ணுயர் ராஜகோபுரங்கள் மற்றும் ஏராளமான திருச்சன்னிதிகளோடு அமையப்பெற்றுள்ள அற்புதக் கற்கோயில்.

திலகவதியார் தனிச்சன்னிதியில் எழுந்தருளி இருக்கின்றார், அப்பர் அடிகள் மூலத் திருமேனி; உற்சவத் திருமேனி என்று இருவேறு தனிச்சன்னிதிகளில் ஆச்சரியமாய் எழுந்தருளி இருக்கின்றார், ஆலய வளாகத்தின் ஒவ்வொரு அணுவிலும் அற்புத அற்புதமான சிற்ப வேலைப்பாடுகள், மூலக் கருவறையில் நெடிதுயர்ந்த பிரமாண்டமான திருமேனியில் வீரட்டானேஸ்வரர் அதி அற்புதமாய் எழுந்தருளி இருக்கின்றார், கண்கொள்ளாத் திருக்காட்சி, சிவலிங்கத் திருமேனியின் பின்னால் அம்மையும் அப்பனுமாய் பிரமாண்டமான உருவத் திருமேனியில் திருக்காட்சி தருகின்றனர், பிறவிப் பயனை நல்கும் அற்புதத் திருக்கோலம்.

அம்பிகை தனிக்கோயிலில், நெடிதுயர்ந்த திருமேனியில் பிரத்யட்சமாய் எழுந்தருளி இருக்கின்றாள், இவளை தரிசிக்கக் கண்கள் கோடி வேண்டும், பிரமிப்பு விலகாத நிலையிலேயே ஆலயப் பிரகாரத்தை வலம் வருகின்றோம், கருவறையின் பின்புறம், வலது புறத்தில், திருப்புகழ் தெய்வமான சிவகுமரன் ஆறு திருமுகங்களும், பன்னிரு திருக்கரங்களுமாய், இரு தேவியரும் உடனிருக்க, மயில் மீதமர்ந்த ஆச்சரியத் திருக்கோலத்தில் எழுந்தருளி இருக்கின்றான், அருணகிரியார் இம்மூர்த்திக்கென 'பரவுவரிக் கயல்', 'விடமும் வேலென' என்று துவங்கும் இரு திருப்புகழ் திருப்பாடல்களை அருளியுள்ளார், காதலுடன் தரிசித்துப் போற்றிப் பயன் பெற வேண்டிய திருத்தலம்.

(Google Maps: Shri Veeratteneswarar Temple, Thiruvathigai, Panruti, Tamil Nadu 607106, India)