திருப்புகழ் தலங்கள்: திருவரத்துறை

(நடு நாட்டுத் திருப்புகழ் தலங்கள்)

பிரிவு: நடு நாடு

மாவட்டம்: கடலூர்

திருக்கோயில்: அருள்மிகு தீர்த்தபுரீஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், திருஞானசம்பந்தர் (தேவாரம்), அப்பர் (தேவாரம்), சுந்தரர் (தேவாரம்)

தலக் குறிப்புகள்:

விருத்தாசலத்திலிருந்து 24 கி.மீ தொலைவில் அமைந்துள்ளது திருநெல்வாயில் அரத்துறை (தற்கால வழக்கில் திருவரத்துறை). தேவார மூவராலும் பாடல் பெற்றுள்ள சிறப்புப் பொருந்தியது. தம்முடைய பிஞ்சுப் பொற்பாதங்கள் நோக இத்தலம் நோக்கிப் பயணித்து வரும் ஞான சமபந்த மூர்த்திக்கு இத்தல இறைவர் முத்துச் சிவிகை; மணிக்குடை; முத்துச் சின்னங்கள் ஆகியவற்றை அளித்து அருள் புரிந்த வரலாற்றினைப் பெரிய புராணம் பதிவு செய்கின்றது.

(ஞான சம்பந்தர் தேவாரம்):

எந்தை ஈசன் எம்பெருமான் ஏறமர் கடவுள் என்றேத்திச்

சிந்தை செய்பவர்க்கு அல்லாற் சென்று கைகூடுவதன்றால்

கந்த மாமலர் உந்திக் கடும் புனல் நிவா மல்கு கரைமேல்

அந்தண் சோலை நெல்வாயில் அரத்துறை அடிகள்தம் அருளே!!

ஏகாந்தமான சூழலில் அமையப் பெற்றுள்ள திருத்தலம், சிவமூர்த்தி தீர்த்தபுரீஸ்வரர் எனும் திருநாமத்தில் எழுந்தருளி இருக்கின்றார், அம்பிகை திரிபுர சுந்தரி. வெளிப்பிரகாரச் சுற்றின் பின்புறம் திருப்புகழ் தெய்வமான கந்தக் கடவுள், ஒரு திருமுகம்; நான்கு திருக்கரங்களுமாய், இரு தேவியரும் உடனிருக்க, நின்ற திருக்கோலத்தில் எழுந்தருளி இருக்கின்றான். அருணகிரியார் இம்மூர்த்திக்கென ஒரு திருப்புகழ் திருப்பாடலை அருளியுள்ளார்,

(Google Maps: Shri Theerthapureeshwarar Temple, Thiruvattathurai, Tamil Nadu 606111, India)