திருப்புகழ் தலங்கள்: திருப்பனந்தாள்

(சோழ நாடு (காவிரி வடகரை) திருப்புகழ் தலங்கள்)

பிரிவு: சோழ நாடு (காவிரி வடகரை)

மாவட்டம்: தஞ்சாவூர்

திருக்கோயில்: அருள்மிகு அருணஜடேஸ்வரர் திருக்கோயில்.

தல வகை: சிவத்தலம்

பாடிய அருளாளர்கள்: அருணகிரிநாதர், சம்பந்தர் (தேவாரம்)

தலக் குறிப்புகள்:

கும்பகோணத்திலிருந்து 20 கி.மீ தொலைவிலும், பந்தணைநல்லூரிலிருந்து 10 கி.மீ தொலைவிலும் அமைந்துள்ளது திருப்பனந்தாள். ஞானசம்பந்த மூர்த்தியாலும், அப்பர் சுவாமிகளாலும் பாடல் பெற்றுள்ள சிறப்புப் பொருந்தியது.

சிவபரம்பொருள் நெடிதுயர்ந்த பிரமாண்டமான சிவலிங்கத் திருமேனியில் அருணஜடேஸ்வரர் (செஞ்சடையப்பர்) எனும் திருநாமத்திலும், அம்பிகை பெரிய நாயகியாகவும் எழுந்தருளி இருக்கின்றனர், காண்பதற்கரிய திருக்கோலம்.

இவ்வாலயத்தில் தாடகை எனும் பக்தைக்காக சிவலிங்கத் திருமேனி சற்று சாய்ந்து விளங்கிய தன்மையினையும், பின்னர் குங்கிலியக் கலய நாயனாரின் அரிய முயற்சியால் இறைவர் மீண்டும் முந்தைய நிலையில் எழுந்தருளிய அற்புத நிகழ்வினையும் பெரிய புராணம் விவரித்துப் போற்றுகின்றது.

தருமை ஆதீனத் திருக்கோயில். விசாலமான ஆலய வளாகம், கடந்த வருடம் நடந்தேறியிருந்த கும்பாபிஷேக நிகழ்வினால் ஆலயம் முழுமையுமே புதுப் பொலிவுடன் மிளிர்கின்றது.

திருப்புகழ் தெய்வமான நம் கந்தப் பெருமான் ஒரு திருமுகம் நான்கு திருக்கரங்களுடன், இரு தேவியரும் உடன் எழுந்தருளியிருக்க, மயிலருகில் நின்ற திருக்கோலத்தில் எழுந்தருளி இருக்கின்றான். அருணகிரிப் பெருமானார் இம்மூர்த்தியை ஒரு திருப்புகழ் திருப்பாடலால் போற்றிப் பரவியுள்ளார்.

(Google Maps: Shri Arunajadeswarar Temple, Sannathi Street, Thirupananthal, Tamil Nadu 612504, India)