திருப்புகழ் தலங்கள்: திருநெய்த்தானம் (தில்லைஸ்தானம்)

(சோழ நாடு (காவிரி வடகரை) திருப்புகழ் தலங்கள்)

பிரிவு: சோழ நாடு (காவிரி வடகரை)

மாவட்டம்: தஞ்சாவூர்

திருக்கோயில்: அருள்மிகு நெய்யாடியப்பர் திருக்கோயில்.

தல வகை: சிவத்தலம்

பாடிய அருளாளர்கள்: அருணகிரிநாதர், சம்பந்தர் (தேவாரம்), அப்பர் (தேவாரம்)

தலக் குறிப்புகள்:

தஞ்சாவூர் மாவட்டத்தில், திருவையாறிலிருந்து சுமார் 2 கி.மீ தொலைவில் அமைந்துள்ளது தில்லை ஸ்தானம் எனும் திருநெய்த்தானம். திருவையாற்றினை முதன்மையாகக் கொண்ட சப்த ஸ்தான தலங்களுள் ஒன்றாகப் போற்றப் பெறுவது (மற்ற ஆறு தலங்கள் திருவையாறு; திருப்பழனம்; திருச்சோற்றுத்துறை; திருவேதிகுடி; திருக்கண்டியூர்; திருப்பூந்துருத்தி).

சிவபரம்பொருள் நெய்யாடியப்பராகவும், பராசத்தி பாலாம்பிகையாகவும் எழுந்தருளி இருக்கின்றனர். ஞானசமபந்த மூர்த்தி ஒரு திருப்பதிகத்தையும், அப்பர் சுவாமிகள் 5 திருப்பதிகங்களையும் அருளிச் செய்துள்ளனர்,

(ஞானசம்பந்தர் தேவாரம் - திருப்பாடல் 1)

மையாடிய கண்டன், மலைமகள் பாகமதுடையான்

கையாடிய கேடில் கரியுரி மூடிய ஒருவன்

செய்யாடிய குவளைம் மலர் நயனத்தவளோடும்

நெய்யாடிய பெருமான் இடம் நெய்த்தானம் எனீரே

(அப்பர் தேவாரம் - திருப்பாடல் 1)

காலனை வீழச் செற்ற கழலடி இரண்டும் வந்தென்

மேலவா இருக்கப் பெற்றேன், மேதகத் தோன்றுகின்ற

கோல நெய்த்தானம் என்னும் குளிர்பொழில் கோயில் மேய

நீலம் வைத்தனைய கண்ட, நினைக்குமா நினைக்கின்றேனே

(இவ்வாலய அர்ச்சகர் திருவையாற்றுத் திருக்கோயிலிலும் தொண்டாற்றி வருவதால் நடைதிறக்க காலை 10.30 மணி வரை ஆகலாம் என்றறிந்து, அர்ச்சக்கரின் அலைபேசி எண்ணில் தொடர்பு கொண்டு, சற்று முன்னதாக வருமாறு கேட்டுக் கொண்டு, அம்மையப்பரையும், திருப்புகழ் வேலவனையும் தரிசித்து மகிழ்ந்தோம்).

பிரகாரச் சுற்றின் பின்புறம் கந்தப் பெருமான் ஒரு திருமுகம் நான்கு திருக்கரங்களோடு, இரு தேவியரும் உடனிருக்க, நின்ற திருக்கோலத்தில் திருக்காட்சி தருகின்றான். அருணகிரிப் பெருமானார் இம்மூர்த்தியை அற்புதச் சந்தத்தோடு கூடிய திருப்பாடலொன்றால் போற்றிப் பரவியுள்ளார்.

Google Maps: NCN052 Sri Neyyadiyappar Temple