திருப்புகழ் தலங்கள்: திருப்பழுவூர் (கீழ்ப்பழுவூர்)

(சோழ நாடு (காவிரி வடகரை) திருப்புகழ் தலங்கள்)

பிரிவு: சோழ நாடு (காவிரி வடகரை)

மாவட்டம்: அரியலூர்

திருக்கோயில்: அருள்மிகு ஆலந்துறை நாதர் (வடமூலநாதர்) திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், சம்பந்தர் (தேவாரம்)

தலக் குறிப்புகள்:

அரியலூர் மாவட்டத்தில், திருச்சியிலிருந்து சுமார் 60 கி.மீ தூரத்திலும், அரியலூரிலிருந்து 12 கி.மீ தூரத்திலும் அமைந்துள்ளது கீழ்ப்பழுவூர், இங்குள்ள சிவாலயம் ஆலந்துறை.

சிவபரம்பொருள் ஆலந்துறை நாதராகவும், அம்பிகை அருந்தவ நாயகியாகவும் எழுந்தருளி இருக்கின்றனர். இறைவரின் திருச்சன்னிதி முன்பாக, ஒற்றைத் திருப்பாதத்தை நிலத்தில் ஊன்றியவாறு தவக்கோலத்திலுள்ள அம்மையின் திருமேனியைத் தரிசிக்கலாம். பரசுமார் வழிபட்டுப் பழி நீங்கிய திருத்தலம்.

ஞானசம்பந்த மூர்த்தியால் பாடல் பெற்றுள்ள சிறப்புப் பொருந்திய பதி,

(ஞானசம்பந்தர் தேவாரம் - திருப்பாடல் 1)

முத்தன்;மிகு மூவிலை நல்வேலன்; விரிநூலன்

அத்தன்; எமை ஆளுடைய அண்ணல்இடம் என்பர்

மைத்தழை பெரும்பொழிலின் வாசமது வீசப்

பத்தரொடு சித்தர் பயில்கின்ற பழுவூரே

பிரகாரச் சுற்றில் தனித்துவமான பேரழகுத் திருக்கோலத்தில் மீனாக்ஷி சுந்தரேஸ்வரர், கங்காள மூர்த்தி, கஜசம்ஹார மூர்த்தி, உமைமங்கை பங்கன், சபாபதி ஸ்ரீநடராஜர், நான்முகக் கடவுள், சிவதுர்க்கை ஆகிய தெய்வ மூர்த்தங்களைத் தரிசித்துப் போற்றி மகிழலாம்.

பிரகாரச் சுற்றின் பின்புறம் கந்தப் பெருமான் ஒரு திருமுகம் நான்கு திருக்கரங்களோடு, இரு தேவியரும் உடனிருக்க நின்ற திருக்கோலத்தில் திருக்காட்சி தருகின்றான். அருணகிரிப் பெருமானார் இம்மூர்த்தியை ஒரு திருப்பாடலால் போற்றிப் பரவியுள்ளார்.

(Google Maps: Sri Aalanthuraiyar or Vadamoolanathar Shiva Temple, National Highway 227, Paluvur, Tamil Nadu 621707, India)