திருப்புகழ் தலங்கள்: சிதம்பரம் - தெற்கு கோபுர வாயில்:

(சோழ நாடு (காவிரி வடகரை) திருப்புகழ் தலங்கள்)

திருப்புகழ் குறிப்புகள்:

ஞானசம்பந்தப் பெருமான் (அடியவர்கள் எதிர்கொள்ள) சென்று வழிபட்ட சிறப்புப் பொருந்திய திருவாயில். இந்நிகழ்வினைக் குறிக்கும் சுதைச் சிற்பத்தினை இத்திருவாயில் சுவற்றில் தரிசித்து மகிழலாம்.

(திருஞானசம்பந்தர் தேவாரத் திருப்பாடல்)

ஆடினாய் நறுநெய்யொடு பால்தயிர்; அந்தணர் பிரியாத சிற்றம்பலம்

நாடினாய்; இடமா நறும் கொன்றை நயந்தவனே;

பாடினாய் மறையோடு பல்கீதமும்; பல்சடைப் பனி கால்கதிர் வெண்திங்கள்

சூடினாய்; அருளாய் சுருங்கஎம் தொல்வினையே

தெற்கு வாயிலின் உட்புறத்தில் நம் வேலவன் தனிசன்னிதியொன்றில், ஆறு திருமுகங்களும்; பன்னிரு திருக்கரங்களுமாய், மயில் மீதமர்ந்த திருக்கோலத்தில் (தேவியர் இல்லாமல்) தனியே எழுந்தருளி இருக்கின்றான். நெடிதுயர்ந்த திருமேனியில் இம்மூர்த்தியின் திருக்கோல தரிசனம் காண்பதற்கரிய திருக்காட்சியாக அமைந்துள்ளது.

அருணகிரிப் பெருமான் 'தெற்குக் கோபுர வாசலில் மேவிய பெருமாளே' என்று இம்மூர்த்தியைப் பணிந்தேத்துகின்றார். இங்கு குமாரக் கடவுளின் திருமுன்பு, இவ்வாயிலுக்கென அமைந்துள்ள திருப்பாடலைப் பாராயணம் புரிந்து வணங்குதல் சிறப்பு.