திருப்புகழ் தலங்கள்: பூவாளூர்:

(சோழ நாடு (காவிரி தென்கரை) திருப்புகழ் தலங்கள்)

பிரிவு: தொண்டை நாடு

மாவட்டம்: திருச்சிராப்பள்ளி

திருக்கோயில்: அருள்மிகு அன்னை குங்கும சௌந்தரி சமேத ஸ்ரீமூலநாதர் திருக்கோயில்.

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

திருச்சியிலிருந்து 25 கி.மீ தூரத்திலும், லால்குடியிலிருந்து 3 கி.மீ தூரத்திலும் அமையப்பெற்றுள்ள திருப்புகழ் தலம். அடிப்படையில் சிவத்தலம், சிவபரம்பொருள் திருமூலநாத சுவாமி எனும் திருநாமத்துடனும், உமையன்னை குங்கும சௌந்தரி எனும் திருநாமத்துடனும் எழுந்தருளி இருக்கின்றனர்.

ஆறுமுக தெய்வம் இத்திருக்கோயிலில் மூன்று திருக்கோலங்களில் அதி ஆச்சரியமாய் எழுந்தருளி இருக்கின்றான். முதலாவது, சிவசன்னிதியின் நேர்பின்புறம், வெளிப்பிரகாரத்தில், தனிச்சன்னிதியில், தெய்வயானைத் தாயார் உடனிருக்க, ஆறு திருமுகங்கள் பன்னிரு திருக்கரங்களுடன், மயில் மயில் மீதமர்ந்த பேரழகுத் திருக்கோலத்தில் எழுந்தருளி இருக்கின்றான். இச்சன்னிதிக்கு மிக அருகிலேயே பால தண்டாயுதபாணியாய் மற்றொரு திருக்கோலத்தில் திருக்காட்சி தந்தருள்கின்றான். மூன்றாவது, அம்பிகையின் திருச்சன்னிதிக்குள், வலது புறம், ஆறு திருமுகங்கள் மற்றும் பன்னிரு திருக்கரங்களோடு கூடிய மயில் மீதமர்ந்த திருக்கோலத்தில் எழுந்தருளித் தரிசிப்போருக்குச் சிவானந்தப் பேற்றினை அளித்தருள்கின்றான்.

ஏகாந்தமான சூழலில் அமைந்துள்ள விசாலமான இத்திருக்கோயில் தரிசிப்போருக்கு நிறைவானதொரு ஆன்மீக அனுபவத்தினை நல்கும் என்பதில் எள்ளளவும் ஐயமில்லை. இத்தலத்திற்கென அருணகிரியார் ஒரு திருப்புகழ் திருப்பாடலை அருளியுள்ளார். இப்பனுவலில், திருஞானசம்பந்த மூர்த்தி மதுரையில் சமணர்களை வாதில் வென்று, சைவப் பெருஞ்சமயத்தினை மீண்டும் நிலைபெறச் செய்தருளிய பெரிய புராண நிகழ்வுகளை நினைவு கூர்ந்துப் போற்றியுள்ளார் திருப்புகழ் ஆசிரியர்.

(Google Maps: Kunguma Sowndari Samedha Thirumoolanathar Temple, Old NH Rd, Puvalur, Tamil Nadu 621712, India)