திருப்புகழ் தலங்கள்: திருத்தவத்துறை:

(சோழ நாடு (காவிரி தென்கரை) திருப்புகழ் தலங்கள்)

பிரிவு: தொண்டை நாடு

மாவட்டம்: திருச்சிராப்பள்ளி

திருக்கோயில்: அருள்மிகு சப்தரிஷீஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

திருச்சியிலிருந்து 24 கி.மீ தொலைவில் திருத்தவத்துறை எனும் திருப்புகழ் தலம் அமையப்பெற்றுள்ளது, தற்கால வழக்கில் லால்குடி. திருநாவுக்கரசு சுவாமிகளின் தேவாரத்தில் 'பண்டு எழுவர் தவத்துறை' என்று குறிக்கப்
பெற்று 'தேவார வைப்புத் தலமாகவும்' திகழ்கின்றது இப்பதி. அடிப்படையில் சிவத்தலம், ஆலமுண்டருளும் சிவபரம்பொருள் இத்தலத்தில் 'ஸ்ரீசப்தரிஷீஸ்வரர்' எனும் திருநாமத்திலும், அம்பிகை 'பெருந்திருப்பிராட்டியார்'. எனும் திருநாமத்துடனும் எழுந்தருளி இருக்கின்றனர். ஸ்ரீமகாலட்சுமித் தாயார் இத்தல இறையவரைப் பூசித்துத் தவமிருந்து ஸ்ரீமகாவிஷ்ணுவோடு இணையப் பெற்றாள் ஆதலினால் தவத்துறை.

பிரமாண்டமான திருக்கோயில், சப்த ரிஷிகளான 'அத்திரி, பிருகு, புலஸ்தியர், வசிஷ்டர், கௌதமர், அங்கீரசர், மரீசி' ஆகியோர் இத்தலத்துறையும் சிவமூர்த்தியைப் பூசிக்க, லிங்க மூர்த்தம் இருகூறாகப் பிளந்து ரிஷிகள் எழுவரையும் தன்னுள் ஈர்த்துச் சிவமுத்தியினை அளித்தருள்கின்றது. அர்ச்சகர் கவசப் பட்டையினைச் சிறிது விளக்கி இதற்கான அடையாளக் குறிப்பினைக் காண்பிகின்றார், வியத்தகு திருக்கோலம். ஆலயத்திலுள்ள ஸ்ரீசரஸ்வதியன்னை மற்றும் ஸ்ரீமகாலட்சுமித் தாயார் ஆகியோரின் திருக்கோலங்கள் ஆச்சரியம் பொருந்தியவை, தரிசிப்போரை வியப்பில் ஆழ்த்துபவை.

திருப்புகழ் தெய்வமான கந்தக் கடவுள் இவ்வாலயத்தில் இருவேறு திருக்கோலங்களில் எழுந்தருளி இருக்கின்றான், சிவசன்னிதியின் உட்ப்ரகாரத்தில், வலது புறத்தில், இரு தேவியருடன் கூடிய நின்ற திருக்கோலத்தில் ஸ்ரீசுப்பிரமணியர் எனும் திருநாமத்துடன், எதிரே சிறிய திருமேனியராய் அருணகிரிப் பெருமான் வணங்கியிருக்க, எழுந்தருளி இருக்கின்றான். இரண்டாவது, அம்பிகை திருச்சன்னிதியின் பின்புறம், ஆறுமுகங்களுடன் மயில் மீதமர்ந்த திருக்கோலத்தில், இருமருங்கிலும் தேவியரோடு எழுந்தருளி இருக்கின்றான்.

(Google Maps: Sri Saptharisheeswarar Temple, Lalgudi, Thirumanjana street, near Akilandeshwari Nagar, Lalgudi, Tamil Nadu 621601, India)