திருப்புகழ் தலங்கள்: திருக்கடவூர்

(சோழ நாடு (காவிரி தென்கரை) திருப்புகழ் தலங்கள்)

பிரிவு: தொண்டை நாடு

மாவட்டம்: நாகப்பட்டினம்

திருக்கோயில்: அருள்மிகு அமிர்தகடேஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், திருஞானசம்பந்தர் (தேவாரம்), அப்பர் (தேவாரம்), சுந்தரர் (தேவாரம்)

தலக் குறிப்புகள்:

நாகப்பட்டின மாவட்டத்தில், மயிலாடுதுறையிலிருந்து சுமார் 20 கி.மீ தொலைவில் அமைந்துள்ள பரம புண்ணிய ஷேத்திரம் திருக்கடவூர் (தற்காலத்தில் சிறிது மருவி திருக்கடையூர் என்று பிரசித்தமாக அறியப் பெற்று வருகின்றது). தேவார மூவரால் பாடல் பெற்றுள்ள சிறப்புப் பொருந்தியது. குங்கிலியக் கலய நாயனாரும், காரி நாயனாரும் திருத்தொண்டு புரிந்து பரவிய திருத்தலம். அபிராமி பட்டரின் திருவாக்கினால் ஒப்புமையற்ற 'அபிராமி அந்தாதி' பாடல் பெற்றுள்ள புண்ணியப் பதி.

தருமை ஆதினத் திருக்கோயில், விசாலமான ஆலயவளாகம் (தற்பொழுது நடந்தேறி வரும் திருப்பணி இரு ஆண்டுகளில் நிறைவுற்று குடமுழுக்குப் பெருவிழா நிகழ்ந்தேறும் என்று அறிகின்றோம்). மூலக் கருவறையில் அமிர்தகடேஸ்வரப் பரம்பொருள் பேரழகுத் திருக்கோலத்தில் எழுந்தருளி இருக்கின்றார், இவருக்கு வலப்புறம் மற்றொரு திருச்சன்னிதியில் காலசம்ஹார மூர்த்தி எழுந்தருளி இருக்கின்றார், அம்பிகையுறையும் இடபாகத்துத் திருவடியால் கூற்றுவனை உதைத்தருளும் காண்பதற்கரிய திருக்கோலம். இம்மூர்த்தியின் திருவடி நிலைகளில் கூப்பிய திருக்கரங்களுடன், சிறிய திருமேனியராய் மார்க்கண்டேயர் எழுந்தருளி இருக்கின்றார்.

'கூற்று மரித்திடவே உதை பார்வதியார்க்கும் இனித்த பெணாகிய மான்மகள் கோட்டு முலைக்கதிபா கடவூருறைப் பெருமாளே ' என்று போற்றுவார் நம் அருணகிரியார்

நால்வேதத் தலைவியான உலகீன்ற; நமையீன்ற அபிராமி அம்மை தனிக்கோயிலில் அழகுக்கு ஒருவரும் ஒவ்வாத வல்லியாய் எழுந்தருளி இருக்கின்றாள், வார்த்தைகளால் விளக்கவொணாத பேரருள் திருக்கோலம். வெளிப்பிரகாரச் சுற்றில், கருவறையின் பின்புறம், வலது புறத்தில் நம் அபிராமி பட்டர் தனிச்சன்னிதியில், இரு கரங்களும் கூப்பிய திருக்கோலத்தில் அற்புதமாய் எழுந்தருளி இருக்கின்றார்.

திருப்புகழ் தெய்வமான நம் கந்தக் கடவுள் அமிர்தகடேஸ்வரர் ஆலயத் திருச்சுற்றிலும், அபிராமி அம்மை ஆலயத் திருச்சுற்றிலும் இரு தேவியரோடு நின்ற திருக்கோலத்தில், திருமுகத்தில் மெலிதான புன்முறுவலோடு எழுந்தருளி இருக்கின்றான். அருணகிரிப் பெருமான் இம்மூர்த்திக்கு 2 திருப்புகழ் திருப்பாடல்களை அருளியுள்ளார்,

(Google Maps: SCN047 - Thirukadaiyur Shiva Temple, 3RF4+WJ4, Thirukadaiyur, Tamil Nadu 609311)