திருப்புகழ் தலங்கள்: திருச்செங்காட்டங்குடி

(சோழ நாடு (காவிரி தென்கரை) திருப்புகழ் தலங்கள்)

பிரிவு: தொண்டை நாடு

மாவட்டம்: நாகப்பட்டினம்

திருக்கோயில்: அருள்மிகு உத்திராபதீஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், திருஞானசம்பந்தர் (தேவாரம்), அப்பர் (தேவாரம்)

தலக் குறிப்புகள்:

காரைக்காலிலிருந்து சுமார் 19 கி.மீ தொலைவிலும், நன்னிலத்திலிருந்து 15 கி.மீ தொலைவிலும், திருப்புகலூரிலிருந்து 4 கி.மீ தொலைவிலும் அமைந்துள்ள திருத்தலம். ஞானசம்பந்தப் பெருமான் இரு திருப்பதிகங்களையும், அப்பர் சுவாமிகள் ஒரு திருப்பதிகத்தையும் அருளிச் செய்துள்ளனர். சிறுத்தொண்ட நாயனாரின் முத்தித் தலம்.

இத்தலத்தினைத் தோற்றுவித்தவர் விநாயகப் பெருமானாவார், கஜமுகாசுர சம்ஹார நிகழ்விற்குப் பின்னர் வேழ முகக் கடவுள் இங்கொரு சிவலிங்கத் திருமேனியைப் பிரதிஷ்டை செய்து பூசித்ததால் கணபதீஸ்வரம். குருதிப் பெருக்கினால் பூமி சிவந்ததால் செங்காட்டங்குடி.

இறைவர் கணபதீஸ்வரராகவும், அம்பிகை திருக்குழல் உமைநங்கையாகவும் எழுந்தருளி இருக்கின்றனர். சிறுத்தொண்டரின் இல்லத்திற்குப் பைரவ வேடத்தினராய் எழுந்தருளி வந்த உத்திராபதீஸ்வரரின் திருக்கோலத்தினைத் தனிச்சன்னிதியில் தரிசிக்கலாம். சிறுத்தொண்டரின் இல்லம் ஆலயத்திற்கருகிலுள்ள மற்றொரு சாலையில் அமைந்துள்ளது.

பிரமாண்டமான ஆலய வளாகம், சிறுத்தொண்டர் - அவரது திருத்துணைவியார் - புதல்வனான சீராளன் - பிள்ளைக்கறி சமைத்த சந்தன நங்கை எனும் தாதியர் ஆகியோர் தனிச்சன்னிதியில் அருகருகே கூப்பிய கரங்களுடன் திருக்காட்சி தருகின்றனர்.

பிரகாரச் சுற்றின் பின்புறம் குமரப் பெருமான் ஒரு திருமுகம் நான்கு திருக்கரங்களோடு, இரு தேவியரும் உடனிருக்க, நின்ற திருக்கோலத்தில் எழுந்தருளி இருக்கின்றான். அருணகிரிப் பெருமான் இம்மூர்த்தியை ஒரு திருப்புகழ் திருப்பாடலால் போற்றிப் பரவுகின்றார்.

(Google Maps: SCN079 Sri Uthirapasupatheeshwarar Swamy Temple, Thiruchengattangudi, Thevaram padal pettra sthalam)