திருப்புகழ் தலங்கள்: வழுவூர்:

(சோழ நாடு (காவிரி தென்கரை) திருப்புகழ் தலங்கள்)

பிரிவு: தொண்டை நாடு

மாவட்டம்: நாகப்பட்டினம்

திருக்கோயில்: அருள்மிகு வீரட்டேஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

மயிலாடுதுறையிலிருந்து சுமார் 8 கி.மீ தொலைவில் அமைந்துள்ள தலம். அஷ்ட வீரட்டத் தலங்களுள் ஒன்றாகப் போற்றப் பெறுவது.

யானைத்தோல் உரித்த வீரட்ட அம்சத்துடன் இங்கு இறைவர் எழுந்தருளி இருக்கின்றார் என்று கொள்வது ஏற்புடையது.

விசாலமான ஆலய வளாகம், துவக்கத்திலேயே மிக நீண்ட அளவிலான திருக்குளத்தினைத் தரிசிக்கலாம். ஆலயத்துள் நுழைந்ததும் திருக்கோயில் சுவற்றில், தாருகவன முனிவர்கள்; பிச்சாடனர் திருக்கோலத்திலுள்ள சிவபரம்பொருள் - அருகில் மோகினி வடிவினரான திருமால் ஆகியோரின் அற்புத சித்திரங்களைத் தரிசிக்கலாம்.

வீரட்டேஸ்வரப் பரம்பொருள் அற்புதத் திருக்கோலத்தில் எழுந்தருளி இருக்கின்றார், அம்மை இளங்கிளை நாயகியாய்த் திருக்காட்சி தருகின்றாள்.

வெளிப்பிராகாரச் சுற்றின் பின்புறம் திருப்புகழ் தெய்வமான நம் குமரப் பெருமான் ஒரு திருமுகம் நான்கு திருக்கரங்களுடன், இரு தேவியரும் உடனிருக்க, நின்ற திருக்கோலத்தில் எழுந்தருளி இருக்கின்றான். அருணகிரிப் பெருமான் இம்மூர்த்தியை இரு திருப்புகழ் திருப்பாடல்களால் போற்றிப் பரவுகின்றார்.

(Google Maps: Vazhuvur - Sree Veerataneswarar 278th thevara vaippu / 4th attaveeratta temple)