திலதைப்பதி

(சோழ நாடு (காவிரி தென்கரை) திருப்புகழ் தலங்கள்)

பிரிவு: சோழ நாடு (தென்கரை)

மாவட்டம்: திருவாரூர்

திருக்கோயில்: அருள்மிகு முக்தீஸ்வரர் திருக்கோயில்

தல வகை: சிவத்தலம் 

பாடிய அருளாளர்கள்: அருணகிரிநாதர், சம்பந்தர் (தேவாரம்)

தலக் குறிப்புகள்: 

திருவாரூரிலிருந்து 23 கி.மீ தூரத்திலும், நன்னிலத்திலிருந்து 13 கி.மீ தூரத்திலும் அமைந்துள்ளது திலதைப்பதி. திலதர்ப்பணபுரி திலதைப்பதியாகி தற்கால வழக்கில் செதிலப்பதி என்றும் அறியப் பெற்று வருகின்றது. சிவபரம்பொருள் முக்தீஸ்வரர் எனும் திருநாமத்திலும், அம்பிகை சுவர்ணவல்லியாகவும் எழுந்தருளி இருக்கின்றனர். 

இத்தலத்திற்கான ஞானசம்பந்த மூர்த்தியின் திருப்பதிகப் பாடல்களால் 'திலதைப்பதி' தலப்பெயர் என்பதும் 'மதிமுத்தம்' ஆலயப் பெயர் என்பதும் அறியக் கிடைக்கின்றது,

-

(ஞானசம்பந்தர் தேவாரம் - திருப்பாடல் 1)

பொடிகள்பூசிப் பலதொண்டர் கூடிப் புலர்காலையே

அடிகளாரத் தொழுதேத்த நின்ற அழகன் இடம்

கொடிகள்ஓங்கிக் குலவும் விழவார் திலதைப்பதி

வடிகொள் சோலைம் மலர் மணம்கமழும் மதிமுத்தமே

இத்தலத்தில் 'என்றுமே அமாவாசை' என்பதைக் குறிக்க, வெளிப்பிரகாரச் சுற்றில் சூரிய சந்திர கிரக தேவர்கள் அருகருகே காட்சி தருகின்றனர். 'அனைத்து நாட்களிலும் இங்கு முன்னோருக்கான கடன்களைச் செய்யலாம்' என்று தல புராணம் அறிவிக்கின்றது. 

ஸ்ரீராமச்சந்திர மூர்த்தி தந்தையாருக்குத் தர்ப்பணம் செய்த தலங்களுள் இதுவும் ஒன்று. வெளிப்பிரகாரச் சுற்றில் சிவலிங்கத் திருமேனிகளை வழிபடும் ஸ்ரீராமரின் திருமேனியைத் தரிசித்து மகிழலாம், அற்புதத் திருக்கோலம்.

வெளிப்பரிகாரச் சுற்றின் பின்புறம் கந்தக் கடவுள் ஒரு திருமுகம் நான்கு திருக்கரங்களோடு, இரு தேவியரும் உடனிருக்க, நின்ற திருக்கோலத்தில் எழுந்தருளி இருக்கின்றான். அருணகிரிப் பெருமானார் இம்மூர்த்திக்கென 3 திருப்பாடல்களை அருளிச் செய்துள்ளார்.

வெளிப்பிரகாரச் சுற்றின் முடிவில் - சந்திர சூரியர்களுக்கு அடுத்தாற் போல் ஸ்ரீதேவி பூதேவி சமேதராக ஸ்ரீமன் நாராயணர் எழுந்தருளி இருக்கின்றார்.

ஆலய வளாகத்திற்கு வெளியே தனிக்கோயில் போன்றதொரு அமைப்பில் ஆதிவிநாயகர் (யானைத் திருமுகமின்றி) நரமுகத் திருக்கோலத்தில் எழுந்தருளி இருக்கின்றார். 

(Google Maps: SCN058 - Arulmigu Sethalapathi Muktheeswarar Temple)

திருப்புகழ் பாடல்கள்:

இத்தலத்துக்கு கிடைத்துள்ள திருப்புகழ் பாடல்கள் 3.

(குறிப்பு: கீழ்க்குறித்துள்ள திருப்பாடல்கள் பாராயணம் புரிவதற்கு எளிதான முறையில், சந்தஓசை மாறாத வண்ணம், முறையாகப் பிரித்துத் தொகுக்கப் பெற்றுள்ளது): 

திருப்பாடல் 1:

தனனத் தனனா ...... தனதான

இறை அத்தனையோ ...... அதுதானும்

இலையிட்டுணல் ஏய் ...... தருகாலம்

அறையிற் பெரிதா ...... மலமாயை

அலையப் படுமாறினி யாமோ

மறைஅத்தனை மா ...... சிறைசாலை

வழிஉய்த்துயர் வானுறு தேவர்

சிறையைத் தவிரா ...... விடும்வேலா

திலதைப் பதிவாழ் ...... பெருமாளே

திருப்பாடல் 2:

தனனத் தனன தந்த தனனத் தனன தந்த

     தனனத் தனன தந்த ...... தனதான

பனகப் படமிசைந்த முழையில் தரள நின்று

     படர்பொன் பணிபுனைந்த ...... முலைமீதில்

பரிவற்றெரியும் நெஞ்சில் முகிலின் கரிய கொண்டை

     படுபுள் பவன முன்றில் இயலாரும்

அனமொத்திடு சிறந்த நடையில் கிளியின்இன்சொல்

     அழகில்தனி தளர்ந்தும் ...... அதிமோகம் 

அளவிப் புளக கொங்கை குழையத் தழுவியின்ப

     அலையில் திரிவனென்றும் ...... அறிவேனோ

தனனத் தனன தந்த தனனத் தனன தந்த

     தனனத் தனன தந்த ...... தனதானா

தகிடத் தகிட தந்த திமிதத் திமிதவென்று

     தனிமத்தள முழங்க ...... வருவோனே

செநெனற் கழனி பொங்கி திமிலக் கமலம்அண்டி

     செறிநல் கழை திரண்டு ...... வளமேவித்

திருநல் சிகரி துங்க வரையைப் பெருவுகின்ற

     திலதைப்பதி அமர்ந்த ...... பெருமாளே.

திருப்பாடல் 3:

தனனத் தனத்த தந்த தனனத் தனத்த தந்த

     தனனத் தனத்த தந்த ...... தனதான

மகரக் குழைக்குள்உந்து நயனக் கடைக்கிலங்கு

     வசியச் சரத்தியைந்த ...... குறியாலே

வடவெற்பதைத் துரந்து களபக் குடத்தை வென்று

     மதர்வில் பணைத்தெழுந்த ...... முலைமீதே

உகமெய்ப் பதைத்து நெஞ்சும் விரகக் கடற்பொதிந்த

     உலை பட்டலர்ச் சரங்கள் ...... நலியாமல்

உலகப் புகழ்ப் புலம்பு கலியற்றுணர்ச்சி கொண்டுன் 

     உரிமைப் புகழ்ப் பகர்ந்து ...... திரிவேனோ

புகர்கைக் கரிப் பொதிந்த முளரிக் குளத்திழிந்த

     பொழுதில் கரத்தொடர்ந்து ...... பிடிநாளில் 

பொருமித் திகைத்து நின்று வரதற்கடைக்கலங்கள்

     புகுதக் கணத்து வந்து ...... கையிலாரும் 

திகிரிப் படைத்துரந்த வரதற்குடன் பிறந்த

     சிவை தற்பரைக்கிசைந்த ...... புதல்வோனே

சிவபத்தர் முத்தர் உம்பர் தவசித்தர் சித்தமொன்றும் 

     திலதைப் பதிக்குகந்த ...... பெருமாளே

(2024 டிசம்பர் மாதம் சென்றிருந்த எங்கள் தலயாத்திரையின் பொழுது எடுக்கப்பட்ட காட்சிகள் இவை)