திருப்புகழ் தலங்கள்: இரத்தினகிரி (வாட்போக்கி)

(சோழ நாடு (காவிரி தென்கரை) திருப்புகழ் தலங்கள்)

பிரிவு: சோழ நாடு (தென்கரை)

மாவட்டம்: கரூர்

திருக்கோயில்: அருள்மிகு இரத்தினகிரீஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர், அப்பர் (தேவாரம்)

தலக் குறிப்புகள்:

கரூர் மாவட்டத்தில், குளித்தலையிலிருந்து சுமார் 9 கி.மீ தூரத்தில் அமைந்துள்ள திருத்தலம். ஐயர்மலை; இரத்தினகிரீஸ்வரர் கோயில் என்று பிரசித்தமாய் அறியப் பெற்று வருகின்றது. அருணகிரிப் பெருமானார் ரத்தின வெற்பு; ரத்னகிரி; மாணிக்ககிரி என்று இத்தலத்தினைப் போற்றுகின்றார்.

சுமார் 1100 படிகளைக் கொண்ட மலைக்கோயில். மேலே செல்ல வின்ச் சேவை உள்ளது, எனினும் உடலில் சக்தியுள்ள வரையில் படிகளேறிச் சென்று இறைதரிசனம் செய்வதே உத்தமமான மரபு (தரிசித்துத் திரும்புகையில் வின்ச் சேவையை பயன்படுத்திக் கொள்ளலாம்). சற்று கடினமான பயணம், ஆங்காங்கே சிறிது சிறிதாக ஓய்வெடுத்து மேலேறிச் செல்ல சுமார் 45 நிமிடம் முதல் 1 மணி நேரம் தேவைப்படும்.

மலைக்கோயிலை அடைவதற்குச் சுமார் 200 படிகளுக்கு முன்னதாகவே சுரும்பார் குழலியம்மையின் திருச்சன்னிதி அமையப் பெற்றுள்ளது. அற்புதப் புன்னகையோடு கூடிய திருமுகத்துடன் அம்மை நின்ற கோலத்தில் எழுந்தருளி இருக்கின்றாள். வணங்கிப் போற்றி மேலும் முன்னேறிச் செல்கின்றோம்.

இரத்தினகிரீஸ்வரப் பரம்பொருள் நெடிதுயர்ந்த பிரமாண்டமான திருமேனியோடு அதி அற்புதமாய் எழுந்தருளி இருக்கின்றார். சிவலிங்கத் திருமேனியின் மேற்புறம் வளைவாக அல்லாமல், அடியவனான அரசனொருவனால் வடுப்பேற்ற திருக்கோலத்தில் திருக்காட்சி தருகின்றார்.

அகத்திய மாமுனி இங்கு மதியவேளையில் அருள் பெற்றிருந்த காரணத்தால் இவ்வாலயத்தில் பிற்பகல் 12 மணி அபிஷேகமும் பூஜையும் மிக விசேடம். இறைவருக்கு 'மத்தியான சுந்தரர்' எனும் திருப்பெயருமுண்டு.

அப்பர் சுவாமிகளின் திருப்பதிகத்தினால் மாணிக்கமலைப் பரம்பொருளைப் போற்றி செய்து வணங்கினோம்,

கால பாசம் பிடித்தெழு தூதுவர்

பாலகர் விருத்தர் பழையார் எனார்

ஆல நீழல் அமர்ந்த வாட்போக்கியார்

சீலமார்ந்தவர் செம்மையுள் நிற்பரே

குடமுழுக்குத் திருப்பணிகள் நடந்தேறி வருவதால் இறைவர்; இறைவி திருச்சன்னிதிகள் தவிர மற்ற திருமேனிகள் யாவும் பாலாலயம் செய்யப் பெற்றிருப்பதனை அறிந்தோம். பெரும் ஏக்கத்தோடு ஆறுமுகக் கடவுளின் (பூட்டியிருந்த) திருச்சன்னிதிக்கு அருகாமையில் நின்றவாறு இத்தலத்திற்கான மூன்று திருப்புகழ் திருப்பாடல்களையும் பாராயணம் புரிந்து போற்றினோம்.

(Google Maps: Arulmigu Rathnagireeswarar Temple, Ayyarmalai)