திருப்புகழ் தலங்கள்: இளையனார் வேலூர்

(தொண்டை நாட்டுத் திருப்புகழ் தலங்கள்)

பிரிவு: தொண்டை நாடு

மாவட்டம்: காஞ்சிபுரம்

திருக்கோயில்: அருள்மிகு பாலசுப்ரமண்யர் திருக்கோயில்

தல வகை: முருகன் திருக்கோயில்

பாடிய அருளாளர்கள்: அருணகிரிநாதர்

தலக்குறிப்புகள்:

காஞ்சிபுர மாவட்டத்தில், காஞ்சிபுரத்திலிருந்து 24 கி.மீ தொலைவிலும், உத்திரமேரூரிலிருந்து 19 கி.மீ தூரத்திலும், பயணப் பாதையின் இருமருங்கிலும் பச்சைப் பசேலென்று வயல் வெளிகளால் சூழப்பட்டு, நகரத்தின் ஆரவாரத்திலிருந்து முற்றிலுமாய் விலகியதொரு ஏகாந்தச் சூழலில் அமையப் பெற்றுள்ளது இளையனார் வேலூர்.

காசிப முனிவரின் வேள்வியினைக் காக்கும் பொருட்டு 'மலையன், மாகரன்' எனும் இரு அரக்கர்களை முருகப் பெருமான் சம்ஹாரம் புரிந்த தலம் இதுவென்றுத் தல புராணம் அறிவிக்கின்றது. 'ஞான சித்தர் சாமிநாத சுவாமிகள்' என்பார் இத்தல முருகப் பெருமானைப் பன்னெடுங்காலம் பூசித்து எண்ணிறந்த திருப்பணிகளையும் இந்த ஆலயத்திற்குப் புரிந்து வந்துள்ளார். இப்புண்ணிய சீலரின் ஜீவசமாதிச் சன்னிதியினை ஆலயத்தின் முதல் பிரகாரத்தில் தரிசிக்கலாம்.

மூலக் கருவறையில் அறுமுக தெய்வம் ஒரு திருமுகம் நான்கு திருக்கரங்களோடு 'பால சுப்பிரமணியர்' எனும் திருநாமம் தாங்கி ஆச்சரியமாய் எழுந்தருளி இருக்கின்றான். வள்ளி; தெய்வயானை இரு தேவியருமாய்ச் சேர்ந்த 'கஜவள்ளி தேவி' தனிச்சன்னிதியில் எழுந்தருளி இருக்கின்றாள். அருணகிரிநாதர் இத்தலத்திற்கென இரு திருப்புகழ் திருப்பாடல்களை அருளியுள்ளார், அவசியம் தரிசித்துப் பயன்பெற வேண்டிய திருத்தலம்.

(Google Maps: Ilayanar velur murugan temple, Murugar Temple, Kambarajapuram, Tamil Nadu 631605)