திருப்புகழ் தலங்கள்: ஸ்ரீகச்சபேஸ்வரர் திருக்கோயில்:

பிரிவு: தொண்டை நாடு

மாவட்டம்: காஞ்சிபுரம்

திருக்கோயில்: அருள்மிகு ஸ்ரீகச்சபேஸ்வரர் திருக்கோயில்

தல வகை: சிவத்தலம்

பாடிய அருளாளர்கள்: அருணகிரிநாதர்

தலக் குறிப்புகள்:

பஞ்ச பூத ஷேத்திரமாகவும், 7 முக்தித் தலங்களுள் ஒன்றாகவும் போற்றப் பெறும் காஞ்சீபுரத்தில் 5 திருப்புகழ் தலங்கள் அமைந்துள்ளன, அவை கச்சி ஏகம்பம் எனும் ஏகாம்பரேஸ்வரர் திருக்கோயில் (37 திருப்பாடல்கள்), கவுரிக் கோட்டம் எனும் அன்னை ஸ்ரீகாமாக்ஷி திருக்கோயில் (2 திருப்பாடல்கள்), குமாரக் கோட்டம் (2 திருப்பாடல்கள்), திருக்கச்சி மேற்றளி எனும் மேற்றளீஸ்வரர் திருக்கோயில் (1 திருப்பாடல்) மற்றும் கச்சிக் கச்சாலை எனும் கச்சபேஸ்வரர் திருக்கோயில் (2 திருப்பாடல்கள்)

கூர்மாவதார இறுதியில் கச்சப வடிவினரான ஸ்ரீமகாவிஷ்ணு பூசித்துள்ள இத்தலத்தின் பிரபாவத்தைக் காஞ்சிப் புராணம் விரிவாகப் பதிவு செய்கின்றது. பிரமாண்டமான திருக்கோயில் வளாகம், திருக்கருவறையில் சிவலிங்கத் திருமேனியின் பின்னே முக்கண் முதல்வரும் அம்பிகையும் திருவுருவத் திருமேனியோடு எழுந்தருளி இருக்கின்றனர், காண்பதற்கரிய திருக்கோலம்.

இத்தலத்தைத் தரிசித்தால் முத்திப் பேற்றினைப் பெற்று உய்யலாம் என்று சிவஞான முனிவர் அருளியுள்ள காஞ்சிப் புராணம் அறுதியிடுகின்றது,

(கச்சபேசப் படலம் - திருப்பாடல் 11 - காஞ்சிப் புராணம்)

அன்று தொட்டென்றும் அக்காஞ்சியின் நீங்கெலா

கொன்றைவார் சடையனை கச்சபேசன்தனைக் கும்பிடச்

சென்றவர் கண்டவர் கருதினர் யாவரும் தீது!தீர்ந்

தொன்றிஒன்றா நிலை மாறிலா முத்தி பெற்றுய்வரே

வெளிப்பிரகாரத்தில் கருவறையின் பின்புறம், வலது புறத்தில் நம் திருப்புகழ் தெய்வம் ஆறு திருமுகங்களுடன் மயில் மீதமர்ந்த திருக்கோலத்தில், இரு தேவியரும் உடனிருக்க எழுந்தருளி இருக்கின்றான். அருணகிரிப் பெருமான் இத்தலத்துறை மூர்த்திக்கு 2 திருப்புகழ் திருப்பாடல்களை அருளியுள்ளார், 'இறைச்சிப் பற்று' என்று துவங்கும் திருப்புகழில் 'கச்சபத்திச்சைப் படுக் கச்சிப் பதிச்சொக்கப் பெருமாளே' என்றும், 'மக்கட்குக் கூறரிதானது' என்று துவங்கும் திருப்புகழில் 'கச்சிக் கச்சாலையில் மேவிய பெருமாளே' என்றும் போற்றிப் பரவுகின்றார்.

சென்னையிலிருந்து 73 கி.மீ தூரத்திலும், செங்கல்பட்டிலிருந்து 40 கி.மீ தூரத்திலும் அமைந்துள்ளது இத்தலம்.

(Google Maps:

Sri Kachabeswarar Temple., Nellukara St, Periya, Kanchipuram, Tamil Nadu 631502, India